إلى الشيعة...من أنتم (2)

أنا عارفة أني قولتلكم بكرة و حركات بس أصلي دلوقتي فالحتة بتاعت حزب الله و حسن نصر الله و كده يعني فمتشوقة جدا, حاسة نفسي بتفرج على أخوية و هو بيلعب جي تي أيه ولا حاجة كده فعاوزة أوصلكم للأحداث بسرعة

المهم يلا بينا نكمل الحدوتة:

تابع من أين جاء الشيعة (تابع دي حاسستني بحصة الدراسات فالمدرسة قوي)

1. يبقى أحنا أخر حد وصلناله هو زيد بن علي اللي بيتبع السنة في كل حاجة غير أنه شايف أن سيدنا علي أفضل من الخلفاء اللي جم قبله (بس الراجل عقيدته زي الفل) المهم أن زيد هيحاول يعمل أنقلاب على الدولة الأموية (سياسة تاني يعني) و هيكون ليه أتباع و يؤيده في كل معتقداته (أبتدنا نشم ريحة شيعة...لقد وقعنا في الفخ) وفعلا هيعملوا حركة أسمها الزيدية ودي أول طائفة شيعية و دي أقرب طائفة للسنة
2. المهم أنهم الزيدية دول كانوا قاعدين مع زيد بن علي (رحمه الله) في قاعدة صفا كده و سألوه عن رأيه في سيدنا أبو بكر و سيدنا عمر (رضي الله عنهما) فالراجل بأخلاق عالية جدا ترحم عليهما, فحبه من اللي قاعدين معجبهمش الكلام و أنفصلوا عنه و بدأوا يكرهوه و يلعنوا أبو بكر و عمر رضي الله عنهما و الناس دول أتسموا "الرافضة" الله أعلم هل عشان رفضوا رأي زيد ولا رفضوا أبو بكر و عمر و في الحالتين الأسم ألش أووي و دول كانوا تاني جروب شيعة يطلع (و ركزوا معاهم لأن قدام هيطلع منهم ناس أسمهم "الأثنى عشرية" و دول بقى البوب الكبير فالشيعة..كله هينكشفن و يبان) طيب محدش فكر أي اللي حصل فالأنقلاب اللي قلته فوق؟؟
3. الأنقلاب فشل!!! و  الأخ زيد رحمة الله قتل في سنة 122 هجري
4. طيب و مش هتسألو عن الأخ التاني؟؟ محمد يعني ولا أكمني مقلتش عليه حاجة...طيب لو بتسألو فالراجل الله يرحمه مات قبل  أخوه 8  سنين بس مات عادي يعني و جه بعديه أبنه و كان أسمه "جعفر الصادق" و ده كان عالم جامد قوي يعني و برده سليم العقيدة و بعدين ده كمان مات تارك وراه أبنه موسى الكاظم اللي كان عالم برده بس مش جامد أوي زي باباه
5. فاللحظة دي أي اللي حصل؟؟ طاطاطاطااا ظهرت الحركة العباسية و اللي كانت عاوزة تكرش الدولة الأموية يروحوا ريحين لمين...للرافضة (الرافضة أنهون, الرافضة اللي قولتلكم عليهم فوق)و فعلا قامت الخلافة العباسية (نسبة إلى العباس عم الرسول صلى الله عليه و سلم) و اللي مسك واحد أسمه أبي عباس و بعدين أبي جعفر المنصور (ودول مش لازم تفتكروا أسميهم...كمبرس يعني) و طبعا الأخوة الرافضة أصابوا بخيبة أمل راكبة جمل لأنهم كان عاوزين حد من أحفاد علي رضي الله عنه هو اللي يمسك
6. المهم بما أن الرافضة دول بطبيعتهم بتوع مشاكل فعملوا قلق في النظام و الخلافة العباسية حابت تهديهم فراح الخليفة المأمون ساعتها عمل ولاية العهد لواحد من أحفاد سيدنا علي رضي الله عنه وهو "علي بن موسى الرضا" وده واحد من ولاد موسى الكاظم اللي قولنا عنه فوق
7. المهم أن القدر لعب لعبته و علي بن موسى مات فجأة فراح العيال الرافضة السخفه مقومين الدنيا و راحوا للعباسين "و أنتم قتلتوه و أنتم و أنتم...." و الجو الهابط ده بس الحمد لله العباسين عرفوا يهدوهوم إلى حدا ما
8. ركزوا أن لحد دلوقتي مفيش أي عك حصل فالعقيدة و مفيش أي خلاف فالدين بأستثناء لعن سيدنا أبو بكر و سيدنا عمر رضي الله عنهما, يعني برده الموضوع سياسي...بصوا هو أنا قربت أخلص الكتاب و الموضوع لسه سياسي بس كل واحد يجي يتشعلق فالدين و يستهبل و يغير على مزاجه و يقولك أنا مذهب جديد (يلا الواد في رمضان نبقى نشتمهم فالعيد إن شاء الله...بهزر والله أحسن تصدقوا و تقولوا أحنا ماشيين على منهج مها) اللي أقدر أوعدكم بيه أن المرة الجاية هفسحكم في أيران (لوووولوووولوووي)يلا إلى الحلقة القادمة 

مهاأبوزيد 

إلى الشيعة...من أنتم (1)

حسنا أطفالي الحلوين بما أني بقالي أسبوع عايشة في جو مغامرات و مؤامرات مثير جدا فقررت أدخلكم معايا (و أيوة قهر و أقتدار) أنا كان بقالي فترة بدخل على بلوجات الشيعة و بأستفز قوووي من رد أغلبية السنة اللي مش بيعملوا حاجة غير أنهم يشتموا في حين أني بلاقي الشيعة بيرودوا عليهم بنتهى الهدوء (طيب أي ده هو مش أحنا اللي على حق يعني أحنا اللي المفروض نبقى هديين) و بعدين فكرت لو أنا اللي جيت أرد عليهم هقول أي؟؟!! و هنا أُصبت بخيبة أمل لأن مع كل روحي السنيه الغيورة فأنا جاهلة

فقررت أني أدور على كتاب

"shia'a for dummies"

و شوف لما البني أدم يخلص النية ربنا بيكرموا أزاي!!..لاقيت نفسي أتكعبلت في كتاب لد\راغب السرجاني (خطيبي) أسمه "الشيعة نضال أم ضلال" بس و من هنا كانت البداية

• أولا من أين جاء الشيعة:

1. في ناس قالت أنهم هما اللي تشيعوا لعلي (رضي الله عنه) ضد معاوية(رضي الله عنه) بس ده بطيخ قووي ليه؟؟لأن ساعت الخلاف اللي حصل كل الناس (اللي كانوا وقتها كلهم على السنة) شافوا أن الأتنين صحابيين جليلين بس واحد ربنا هداه للصواب و واحد أجتهد ولم يصل للصح و أن لو فعلا الشيعة هم أنصار علي فهل معنى كده أن علي فكره شيعي؟؟!!لأ لأن كل حاجة بتقول أن علي (رضي الله عنه) مبادئه كلها على سنة حبيبه و حبيبنا صلى الله عليه و سلم يبقى كده ده مش بداية الشيعة
2. في ناس تاني قالت أن بدايتها عند مقتل الحسين (رضي الله عنه) و ده غالبا الصح ليه بقى؟؟ لأن وقت حكم يزيد بن معاوية شوية من أهل العراق دعوا الحسين (رضي الله عنه) أنه يجي يحرارهم من الظلم ووعدوه أنهم هينصروه و يأيدوه و بعدين لما وصلهم عملوا الدنيئة وتخلوا عنه في أخر لحظة فأستشهد هناك (رضي الله عنه) فهما حاسوا بالذنب (بعد أيه كاتهم نيله) المهم,فقرروا يكفروا عن بلاويهم و يخروجوا عن الدولة الأموية (وغالبا عشان كده هما بيحتفلوا بأستشهاد الحسين (رضي الله عنه) ومش بيحتفلوا بأستشهاد علي (رضي الله عنه) أيوه عرفين لما يجيبوهم بيضربوا نفسهم و يقولوا "يا حسين يا حسين" هوا ده الأحتفال
3. ركزوا في حاجة, إن لحد دلوقتي الناس كلها على السنة و مفيش حته ريحة شيعة كده فيهم الموضوع كله خلافات سياسية و  عك كده ملوش أي دعوة لا بدين ولا عقيده...المهم بعد سيدنا الحسين (رضي الله عنه) جه أبنه "علي زين الدين العابدين بن الحسين" أسمه حلو قوي...المهم أنه رحمه الله كان راجل صالح جدا و عقيدة زي الفل و خلف ولدين "محمد الباقر" و "زيد"والأتنين كانوا كويسين جدا و كانوا شديدي الورع و التقوى و كانوا على منهج الصحابة و التابعين عادي يعني إلا أن زيد بن علي كان شايف أن علي بن أبي طالب (رضي الله عنه) أولى بالخلافة من أبي بكر و عمر و عثمان (رضي الله عنهم أجمعين) بس مع ذلك لا ينكر لهم الفضل بس شايف أن على (رضي الله عنه) فضله أكبر و رغم أنه كده عاكس أحديث كتتتييير عن فضلهم فهو لسه عقيدة سنيه زي الفل
4. من هنا بدأت رياح التغير...قولت أديكوا حتة ساسبنس على لغة عربية فالأخر...يلا بكرة نكمل إن شاء الله
   

مها أبوزيد