وحضرت الدرس =)

السلام عليكم

بصوا النهاردة مش شيعة برضوا معلش

النهاردة ربنا كرمني وحضرت درس كان بقالي سنة محضرتوش, بس ربنا حب يذكرني لعلي أتوب وارجع لصحبة كانت ولا تزال نعم الصحبة, ناس لا تجمعني بيهم إلا محبة الله عز وجل ناس رغم أنهم ميعرفوش عني أغلب أسراري ألا أنهم بيحبوني حب أحلى من أي حب أتحبته تاني لأنهم بيحبوني فالله =) فجزاهم الله عني خير الجزاء

المهم أن الدرس كان بيتكلم عن أي؟؟؟

# معرفش لأني رحت متأخرة :$

# المهم أني دخلت والمعلمة بتقرأ الأية دي

 {أَفَمَنْ أَسَّسَ بُنْيَانَهُ عَلَى تَقْوَى مِنَ اللَّهِ وَرِضْوَانٍ خَيْرٌ أَمْمَنْ أَسَّسَ بُنْيَانَهُ عَلَى شَفَا 

جُرُفٍ هَارٍ فَانْهَارَ بِهِ فِي نَارِ جَهَنَّمَ}

اللي هو حاسيت هتقولي فالأخر "أيوه أنتي يالي داخلة من الباب"

# النظرية أن ينفع ترجعي تقوي الأساس, المهم أنك تفتكري أنتي أبتداتي ليه؟؟؟؟

 يعني  فاكرة أول سجدة سجدتيها وربنا رزقك قلب طاهر ونفس مستغفرة وبكاء 

لدرجة أنك حسيتي أنك مش عاوزة تقومي من السجدة؟؟؟ سجدتي السجدة دي ليه؟؟

# الدين مفهوش شرط دخول يعني مينفعش أقول لربنا "يا رب أنا هألتزم بس مش 

هاقدر صحابي يبعدوا عني"

بصوا سيدنا إبراهيم قاله ربنا أيه

 " إِذْ قَالَ لَهُ رَبُّهُ أَسْلِمْ قَالَ أَسْلَمْتُ لِرَبِّ الْعَالَمِينَ"

مفيش على طول, أسلم...أسلمت

يبقى أحنا محتاجين نحسن البناء...يعني ماينفعش أول ما نقع نقول "يا رب ما أنا جتلك 

ورحت دروس وعملت وسويت وفالأخر وقعت برضوا"

ساعتها يبقى العيب فينا أحنا ولازم نرجع نصّلح الأساس

# طيب نعرف أمتى إن أساس قلبك بُني على تقوى الله؟؟؟ فالأبتلاءات

وقت البلاء يتباين أصحاب البنيان

أمتى هتشكري نعم ربنا؟؟؟!! يكفيكي نعمة البصر وكفى بها نعمة

طيب أي أكتر حاجة بتهلك الإيمان؟؟

عدم التصحيح وقلة المحاسبة

# وغير كده قلبك مش بأيدك يعني مابتتحكميش فيه...بص كام مرة أتفرجنا على فيلم

 وأعجبنا بشكل حد أو فالشارع وشوفتي ولد وبنت ماسكين أيد بعض وكل اللي جه 

فدماغك "وأنت هتتحب أمتى يا منّيل؟!"

لو لم تنكري المنكر بقلبك فأعلمي أن في إيمانك خلل

عَنِ ابْنِ عَبَّاسٍ رَضِيَ اللَّهُ عَنْهُمَا ، قَالَ : قِيلَ : يَا رَسُولَ اللَّهِ ، أَتَهْلِكُ الْقَرْيَةُ وَفِيهَا الصَّالِحُونَ ؟ قَالَ : نَعَمْ ، قِيلَ : بِمَ ؟ قَالَ : بِتَهَاونِهِمْ وَسُكُوتِهِمْ عَنْ مَعَاصِي اللَّهِ .

# قال حذيفة: سمعت رسول الله صلى الله عليه وسلم يقول: «تُعرض الفتن على 

القلوب كعرض الحصير عودًا عودًا، فأي قلب أُشربها نُكت فيه نكتة سوداء، وأي 

قلب أنكرها نُكت فيه نكتة بيضاء حتى تصير على قلبين على أبيض مثل الصفا فلا 

تضره فتنة ما دامت السماوات والأرض، والآخر أسود مربادًا كالكوز مجخيًا لا 

يعرف معروفًا ولا ينكر منكرًا إلا ما أُشرب من هواه»

يعني من الأخر كل ما ترى منكر فتنكره ولو بقلبك أتحطت فقلبك نقطه بيضاء ولو 

العكس أتحطت نقطه سوداء وهكذا لحد ما فالأخر قلبك هيكون يا أسود يا أبيض

# طيب كده الموضوع صعب, يعني أمتى أنكر المنكر بلساني؟؟مش ممكن ساعتها 

أكره الناس فالدين وأشيل ذنب كل واحد كره الدين بسببي؟؟ولو نكرته بقلبي وده صعب 

جداااا مش ممكن ساعتها أكون ساكته عشان الناس ماتضيقش مني ويكون كده حبهم 

فقلبي أكبر من حب ربنا فقلبي؟؟؟....لا صعب ولا حاجة بص ربنا بيقول أيه؟؟

 وَلَوْ عَلِمَ اللَّهُ فِيهِمْ خَيْرًا لأسْمَعَهُمْ

ربنا أكتر حد عالم بينا, فربنا لو علم ان قلبك كويس هيسرلك أنك تنكري المنكر 

بالطريقة اللي تخدم دينه...يعني هيخليكي تتكلمي فالوقت وبالطريقة اللي تحبب 

الناس فالدين وتسكتي وقت ما ده هيكون فائدته أكبر....بس أحنا نصّلح قلوبنا

وفالأخر أحنا لو فعلا بنعمل الحاجة لله مش هنخاف فالحق لومة لائم لأننا خلاص 

خرجنا الناس من حسابتنا وبصين عالأخرة

# بس نركز أوووي أننا مش نروح نقعد فمجالس المنكر بس عشان ننكره يعني 

مينفعش أنتي تلتزمي وتروحي تخرجي مع كل صحباتك المش ملتزمين هتُفتني




 القلب اللي متخفيش عليه الفتنه هيضيع!!!

طيب يعني أسبهم؟؟ لأ بس خلي الكورة فملعبك...يعني خدي واحدة صاحبتك مش 

ملتزمة وخرجيها مع صُحبتك الصالحة, هتلاقيها هي نفسها بدأت تفكر زيكم

 # طيب نرجع لموضوع تأسيس القلب...

أول حاجة محتاجين نعرفها, أن مافيش ذنب منقدرش نتوب منه, الطاعات بتتفاوت على 

قدرة كل واحد (بلا تهاون فالفرائض طبعا) لكن فالذنوب, هنلاقي أن الله عز وجل لما 

حرّم الحرام, حرّمه على علم...يعني أحنا نعرف نبطل المنكرات بس أحنا اللي بنضحك 

على أنفسنا فمن كتر أنغمسنا فالمعاصي ربنا بيعاقب القلب بالأنشغال بالدنيا

{ولا تكونوا كالذين نسوا الله فأنساهم أنفسهم أولئك هم الفاسقون}

# وساعات تانيه بنكون عاصين وحشين وربنا يرزقنا خشوع منستاهلهوش عشان 

يأدبنا (يعني بيديهولك فضل منه عشان ترجعي له)

# يبقى المفروض نستغل الفرصة ونكون عباد لله حقا, نكون العبد اللي لم يأسَ على ما 

فات، ولم يفرح بما هو آتٍ؛ فلا خُيَلاء عند غنى، ولا حزن عند افتقار، لا يبطر إن 

رَئِس، ولا يتكدر إن رُئِس، يقلق من الدنيا، ولا يقلق على الدنيا أبدًا، يستعجل الباقية على 

الفانية؛ فتجده راضي النفس، مطمئن الفؤاد،

ونفتكر أن الله عز وجل هو الذي يبدأ ويُعيد, يعني هيرجعنا بس هو يشوف قلوبنا مشتقاله 

وهيرجعنا

ونداوم المحاسبة فالمؤمن يحاسب نفسه ف3 حالات:

1) قبل العمل

2) أثناء العمل

3) بعد العمل

وربنا أكيد هيساعد اللي بيحاسب نفسه أكتر من أنه يساعد واحد غافل عايش فالبطاطا 

كده

أصل أحنا لو فكرنا فذنوبنا وحولنا نحاسب نفسنا هنتكسف ونلم نفسنا

زي مثلا حد بيعصي ربنا فحس بحركة حوليه فخاف فأصبح خوفه ده أكبر عند ربنا من 

الذنب!!!

عارفين ليه؟؟ لأنه وجل من الناس ولم يجل من الله عز وجل (يعني خشية لغير الله ودي 

مرتبه من مراتب الشرك أعوذ بالله)

(أَتَخْشَوْنَهُمْ فَاللّهُ أَحَقُّ أَن تَخْشَوْهُ إِن كُنتُم مُّؤُمِنِينَ)

طيب لو الطاعة لسه صعبه عليك؟؟؟ ساعتها أعرف أن قلبك لسه مش مُتكل على الله حق 

توكله

يعني المشكلة مشكلة قلب برضوا

# ونركز قووووي فالنقطه دي:

عدم الرضا عن الله وقضاءه بيفقد الأنسان الخشوع فكل الطاعات (ما أنتي مش راضية 

هتخشعي أزاي, هتتذلي لله وتنكسري له أزاي و أنتي قلبك مكابر...أه ما اللي أكتشفته أن 

عدم الرضا ده كبر...ربنا يعافينا ويعفوا عنا)

# وبصوا بقى حلاوة الأيه دي:

 (وَلَٰكِنَّ اللَّهَ حَبَّبَ إِلَيْكُمُ الْإِيمَانَ وَزَيَّنَهُ فِي قُلُوبِكُمْ)

قالك عز وجل أنك أنت اللي حبيت منك لنفسك؟؟؟ لأ قالك "حبب" يعني ربنا بس عاوز 

يشوفنا بنحاول وعاوزين نروح له وهو هيجيب قلوبنا تسجد تحت عرشه على طول بس 

أحنا نحاول...ما أحنا فالأخر بنعبد رب رزاق كريم =)

الخطوات العملية بقى:

1) حساب النفس: كل يوم وعلى الحلو قبل الوحش (يعني فالحلو أخلصتي النية؟؟


 عملتيه بأتقان؟؟)

2) الأعتراف بالذنب

3) الأعتذار لله:{  يَوْمَ لَا يَنْفَعُ الظَّالِمِينَ مَعْذِرَتُهُمْ وَلَهُمُ اللَّعْنَةُ وَلَهُمْ سُوءُ الدَّارِ}...يعني 

أحنا كده كده هنعتذر, يبقى نلم نفسنا ونعتذر فالدنيا وناخد حسن الدار فالأخرة

4) ألزم نفسك بطاعة سرية محدش يعرفها غيرك أنت وربنا

5) أختار باب لله (صلاة نوافل- صدقة- قيام- قرأن - ذكر....كل واحد عارف بابه) ولو 

مش عارف أدعي : "اللهم أفتح لي بابا من أبواب علمك تفتح لي به بابا من أبواب 

جنتك...أمين"

 6) توب توبه نصوحه: قال الربيع بنُ خُثيمٍ (ده واحد من التابعين بس عسول قوي 


هبقى أحكلكم حكايته إن شاء الله) لأصحابِهِ :

تدرونَ ما الداءُ و ما الدواءُ و ما العلاج ؟؟

قالوا : لا !!!

قال : الداءُ : الذنوب ..

و الدواءُ : الإستغفار ..

و الشفاءُ : أن تتوبَ فلا تعود ..

7) مناجاة الله: أقعد كلمه قول له أنك قلبك ميستحملش أنه يكون غضبان عليه...أنك 

عصيته من ضعفك ومش هيقويك غير أنه يمنحك الإيمان...

أدعولي بقى أن ربنا يرزقني الثبات عالدرس ده وأنا هبقى أقولكم كل اللي بيتقال إن شاء الله

لا تنسوني في صالح دعواتكم

اللهم لا تجعلني جسرا يعبر به أحبتي إلى الجنه ثم يلقى به فالنار...أمين

إلى الشيعة...من أنتم (13)

أولا بعتذر جدا جدا على التأخير وخصوصا لأية (جزاكي الله عني خيرا)
ثانيا, سبب التأخير أني كنت بعمل تاني شغل رسمي ليه (وهو غلاف كتاب دين وسلوكيات) وبصراحة أنا فرحانة به قووي فحطيته لكم هنا =)

دوسوا عليها عشان تشفوها وهي كبيرة وحلوة كده

---------------------------------------------------------------------------------------------

نرجع للحدوته


يبقى أخر حاجة وصلنلها أنهم عملوا حركة أمل الأسلامية وبعدين جالهم دعم من سوريا وإيران وبقوا تبع الخوميني 100% ولقيت الكاركاتير ده وحاسيتوا منطقي أوووي

المهم أن الحرب الأهلية فلبنان فضلت تزيد وقوة حركة أمل الأسلامية بقيادة عباس الموسوي بتزيد

وفوقت غالبا جابوا رئيس قسم تسويق جديد وغيروا أسمها من "حركة أمل الأسلامية" ل"حزب الله" وعباس الموسوي أعلن الأسم الجديد في سنة1985م فشهر فبراير وبعدها ب3 شهور عملت حركة أمل العادية بقيادة "نبيه البري" ده مجزرة ضدد الفلسطينيين عشان يخلصوا عالفلسطينيين اللي كانوا متبقيين فالجنوب وبعدين بدأوا يتخانقوا مع حزب الله للسيطرة عالجنوب

وانتهى الموضوع بموقعة كبيرة حزب الله طحن فيها حركة أمل  فسنة 1988 واتحول 90% من أفرادها لحزب الله (زي فلول الحزب الوطني ما بيعملوا دلوقتي) وبكده حركة أمل أحترمت نفسها وخرجت من النظام العسكري وخلوهم فالسياسة بس (كوشك صغير على قدهم كده)

ومع أن بعد خروج حركة أمل كده الساحة فضيت لحزب الله,صح؟؟ لأ...ليه بس؟؟ عشان ساحة أه أصلا ما اليهود وخدين الجنوب اللي هو ساحة حزب الله وعملينه بلاي جروند ليهم!!


 قوم يعمل أي حزب الله؟؟ يدور له على ساحة تانية...يروح فين؟؟ينفع يروح بيروت الشرقية ويضايق النصارى اللي هناك, لأ طبعا عيب...راح رايح لبيروت الغربية والجنوبية, ليه؟؟؟ عشان دي اللي فيها السنة...أمال يقرف مين غيرهم وفعلا بدأ يبنوا أملاك ليهم ألا فالمناطق العامة (نظام يقفّل له شارع ويقعد فيه) أو يأخدوا ممتلكات السُنّة غصب وأقتدار وطبعا الحكومة اللبنانية نايمة فالعسل...
لحد ما فعلا ضاحية لبنان الجنوبية أصبحت شيعية مخلّصة وسيطر عليها حزب الله تماما


وفي سنة 1989م توفى الخوميني بتاع ولاية الفقية والثورة والرغي ده (يعني فالسنة اللي أنا أتولدت فيها, الخوميني خرج...مصري أم الإيراني) المهم أنه ساب وراه علي الخامئني يكون مرشد الثورة الجديد (بجد عندهم أزمة أسماء) المهم أن الموضوع مفرأش كتير يعني تعدد الفقهاء والولاية واحدة


وفنفس ذات السنة السعودية كتّر خيرهم جمعوا أطراف الصراع اللبناني كلهم وصالحوهم على بعض وأنتهت الحرب الأهلية اللبنانية


بس مع الأسف فنفس السنة حصلت حاجة وحشة قوي (بس فأخر السنة أنا مليش دعوة أنا مواليد شهر مارس) مات أكبر شخصية سُنّية فلبنان وده بقى كان عسول قووووويي وطيب قوي, ربنا يدخله الجنة...أمين


هو مين بقى؟؟ أسمه الشيخ حسن خالد (أسمه سُنّي أوويي كيووووت) ربنا يرحمه كان مفتي لبنان من سنة 1966 وبكده يكون فقد سُنّة لبنان زعيمهم فالوقت اللي يظهر فيه حزب الله كرمز إسلامي فلبنان =(

بوصوا شكلوا طيب قوويي يعني...ياله راح مننا ده ربنا يرحمه

المهم أن حزب الله بدأ بعد كده يجهز لحرب اليهود عشان يرجع منطقته ويعملها دولة شيعية...إيران ماصدقت...فلوس تبعت, سلاح تبعت أي حاجة تنفع تبعتها وطبعا سوريا كمان


اليهود يسكُتوا؟ أبدا, راحوا مغتالين "عباس الموسوي" فسنة 1992م وراح الشيعة عملوه القائد الشهيد وساعتها طلع "حسن نصر الله" يمسك زعامة حزب الله لحد يومنا هذا


طيب فين السُنّة؟؟ فوقت أغتيال عباس ظهر رمز سُنّي جديد وده "رفيق الحريري" وديه أول مرة أعرف أنه ربنا يرحمه كان تبع حزب الكيوتس =)


وفعلا رفيق الحريري مسك رئاسة وزارة لبنان من سنة 1992م لسنة 1996م وفعلا ابتدى يبني لبنان من جديد وأتلف حوليه كتير من أهل لبنان

ربنا يرحمه هو كمان

وفسنة 1996م الصهاينة عملوا هجوم مرعب بكل معنى الكلمة على لبنان وكان أسمه "عناقيد الغضب"

 هنا بقى أبتدا اللبنانيين يتخنقوا وقرروا الخلاص من الاحتلال الصهيوني، وأعلن حزب الله عن تكوين السرايا اللبنانية لمقاومة العدو الصهيوني، ودخل فيها كل الشعب اللبناني بطوائفة المختلفة، وكان أكثر أعضاء هذه السرايا من أهل السُّنَّة حيث كانوا يمثلون نسبة 38%، بينما مثَّل الشيعة 25%، إضافةً إلى 20% من الدروز، و17% من المسيحيين. (بس عيب عليكم برضوا الدنيء دنيء...حزب الله قدام هيقولوا أنهم حربوا لوحدهم عادي يعني)

وفعلا الهجمات السرايا دي خلت الجيش الصهيوني ينسحب من معظم مناطق جنوب لبنان في سنة 2000م باستثناء مزارع شبعا (فعلا ناس تخاف متختشيش)، واحتل حزب الله كل هذه الأماكن، ورفض أن ينشر الجيش اللبناني قواته في هذه المناطق، وعمل عبده العبيط للجهود المشتركة التي ساعدت في تحرير لبنان، ده من جبروتهم أبتدوا يتعدِّوا على أملاك السُّنة في الجنوب وفي جبل لبنان، ووصل الأمر إلى التعدي على بعض المساجد مثل مسجد النبي يونس، والأوقاف التابعة له في منطقة الجية. (وده على أساس أن من النهاردة مفيش حكومة!!)

رفيق الحريري اللي طلع كيوت يسكت؟؟

لأ طبعا...خصوصا أن فالوقت اللي خرج فيه اليهود كان هو تولى رئاسة الوزاره تاني (عادي جدا, بردوا لبنان مزاج أحنا عندينا الوزارة لتخرج منها للقبر يألا تخرج بالملايين اللي برضوا مش هتاخودها فالقبر لكن تخرج وترجع دي جديدة)

، وبكده يكون ظهر في الصورة تاني هو وعايلته، ليصبح من الرموز السنية المشهورة التي تمثِّل منافسة حقيقية قوية الشيعيه في لبنان (لما نشوف أي أخرتها!!).

حزب الله يسكت؟؟

لأ يرضوا, خصوصا أن قوتهم كانت عماله تكبر وعاوزين يستغلوا

 الفرصة لإقامة دولتهم الشيعية المؤيَّدة بإيران وسوريا اللي قارفنا بيها من بداية الحدوتة

في سنة 2004م استقال الحريري من رئاسة الوزراء لخلافه مع السوريين اللي جيشهم كان مالي لبنان و مش عاوزين يخروجوا منها،

 وبعدين حصلت المفاجأة المُدوِّية في 14 فبراير سنة 2005م

أي اللي حصل؟؟ اغتيال رفيق الحريري وهو في موكبه في بيروت!!!،

وكان ساعتها في عدد ضخم من المخابرات العالمية تعمل في الساحة اللبنانية مثل المخابرات الأمريكية والفرنسية والسورية والإيرانية واللبنانية، ولتفقدَ السُّنَّة في لبنان رمزًا فريدًا من رموزها (لتاني مرة على التوازي وحسن نصر الله لسه مكمل عادي يعني...مش بفول عليه ولا حاجة يعني)

بعد أغتيال الحريري لبنان قامت مأعدتش، وكل الدول قالتلك دي سوريا ما هما اللي كانوا متخانقين مع الراجل برضوا،  فطالب المجتمع الدولي سوريا بالانسحاب من لبنان، فقام حزب الله بمسيرة كبرى في 8 مارس 2005م ليؤيد وجود سوريا في لبنان وعدم خروجها (على نظام ميدان مصطفى محمود هنا واللي يقولك الأغلبية الصامتة وكده يعني)

 فردَّ عليه تيار المستقبل -وهو تيار عائلة الحريري- بزعامة سعد الحريري، ومعاه بحزب اللقاء الديمقراطي الدرزي بقيادة وليد جنبلاط، وكذلك حزب القوات اللبنانية الماروني بقيادة سمير جعجع- بمظاهرة كبيرة على نظام مليونيات ميدان التحرير في 14 مارس 2005م يطالب فيها بخروج سوريا من لبنان؛ ولهذا أطلق على هذا التجمُّع اسم 14 آذار (وغالبا أذار ده شهر مارس بس بلغة أخرى أنا بشوفه فالنتيجة ساعات...ألا متعرفوش دي لغة أي؟؟)، وبالفعل خرجت سوريا من لبنان في نفس الشهر.

حزب الله بعد خروج سوريا بقى منظره وحش قوووي (أحساس "لقد وقعنا فالفخ") ، وخصوصا بعد ارتفاع النبرة الطائفية بقوة بعد اغتيال الحريري، بس برضوا الشيعة دول مبيغلبوش...فراح حزب الله قلب الدكانه سياسي شوية وعمل نفسه هيتحد مع القوى الأخرى ليدخل انتخابات البرلمان اللبناني في مايو 2005م، وعامل نفسه حاطت أيده فأيد ثلاثة مجموعات تانيه هي: تيار المستقبل السني وتيار جنبلاط الدرزي - مع أنهم مش بيطيقوهم بس أحنا من الأول عرفين أن الشيعة "مصلحتك أولا"- وكمان حركة أمل السياسية (ياااه أنتم لسه عايشين)، وسموا الليلة دي كلها "التحالف الرّباعي"، وخدوا كلهم مع بعضيهم كده 72 مقعدًا نيابيًّا من أصل 128، فبقوا أغلبية، وصارت منها حكومة لبنان برئاسة فؤاد السنيورة (أظن عارفينه ده).

المهم أن حزب الله عصر على نفسه لمونه وجه على نفسه وشارك السُّنيين برغم خلافه معهم؛ (لأن ساعتها قسم التسويق قال أنهم لازم يظهروا بصورة المشاركة الوطنية وبلادي بلادي وكده)، ومع ذلك فإنّ حسن نصر الله لم يكن يحضر اجتماعاتهم ولا المؤتمرات العامة الجامعة (مش برستيجوه بردوا) لكن كان بيبعت مندوب عنه، وكان يتعامل معهم كلهم بصيغة فوقيَّة كأنه أصلا زعيم عليهم بس سايبهم بيتسالوا.

مش مصدقني؟؟طيب بصوا بقى الحركة اللي عملوها كأن لبنان دي المزرعة اللي بابي سابهالهم (يا باشا الراجل ده بيقول أنه بابي وأنا معرفوش أصلا)

في 12 يوليو سنة 2006م: عمل حزب الله عملية عسكرية ضد الصهاينة أسروا فيها جنديين وقتلوا ثمانية، من غير ما يخدوا رأي حد (عادي يعني كيفه كده) ومن غير ما يعملوا أي أعتبار للدولة اللي بيشاركون في حُكمها، ولا للحلفاء اللي صعدوا بها إلى المجلس النيابي، وكانت هذه العملية العسكرية هي السبب في جرِّ الدولة بكاملها، وليس حزب الله فقط في الحرب مع الكيان الصهيوني!!!

وكل ده على 8 صهاينة ماتوا و 2 أتاخدوا...طيب يعني إن سرقت أسرق جمل, يعني بدل كده كده ناوي تلبس لبنان كلها فالحيط عالأقل فرحهم بكام دبابة ولا أي حاجة قبل ما تتربقها فوق دماغهم!!

وفعلا دقت طبول الحرب في يوليو 2006م، واستمر القصف الصهيوني للبنان مدة 33 يومًا كاملة!!!، وكان الهدف الصهيوني هو تدمير البنية التحتية لحزب الله، وبالمرة لبنان، وكالعادة حزب الله ماسكتش اليهود تضرب صوايخ هما يرودوا بالصواريخ، وسقطت أعداد كبيرة من القتلى في لبنان، بس هما البُعده الأتنين يفرق معاهم حاجة (أوحش من سيدي ألا ستي يعني) المهم أن اليهود مش عرفوا يوقفوا صواريخ حزب الله (ودي أول فرحة يفرحهالي الشيعة من أول الحدوته)، وخلّص اليهود قصفهم من غير لا يدمِّروا قوة حزب الله الصاروخية، ولا يرجّعوا الجندييْن المخطوفين.

وخلصت الحرب المدمرة ليواجه المجتمع اللبناني وضعًا مؤسفًا من الدمار الذي شمل كل أجزاء الوطن، وليواجه كذلك تضخمًا شيعيًّا كبيرًا متمثِّلاً في حزب الله الذي ما زال يحتفظ بسلاحه الإيراني المتطور، وبدعمه السوري الجارف، وليشعر الجميع أن البلاد تتجه إلى قيادة شيعية خاصة، مع حالة التعاطف الإسلامي العام مع حزب الله لحربه ضد اليهود.

تفتكروا أي اللي حصل فلبنان بعد كده؟ والشيعة دول عملوا أي تاني؟  هقولكم المرة اللي جايه إن شاء الله