الكبائر

سيبكم العنوان جامد جدااا

يحسسك أنك مش عاوز تقرأ اللي مكتوب (أصلا لما كنت بدّور على صورة أحطها, كل اللي طلعلي حجات نار و شيطان و جرفيكس رديئة لناس مرعبة) المهم

استوقتني أية: (وَلِلَّهِ مَا فِي السَّمَاوَاتِ وَمَا فِي الأَرْضِ لِيَجْزِيَ الَّذِينَ أَسَاءُوا بِمَا عَمِلُوا وَيَجْزِيَ الَّذِينَ أَحْسَنُوا بِالْحُسْنَى * الَّذِينَ يَجْتَنِبُونَ كَبَائِرَ الإِثْمِ وَالْفَوَاحِشَ إِلا اللَّمَمَ إِنَّ رَبَّكَ وَاسِعُ الْمَغْفِرَةِ) 

و بما أن ربنا كان بيذّكر صفات المحسنين (اللي هي أعلى مرتبة يوصلها المسلم بعد الإسلام و الإيمان) فلازم الواحد يصحى و يركز, المهم أني مركزتش.

فبعدها بكام يوم- كان يوم الجمعة- فكنت معادية بالصدفة على المطبخ (لا كنت رايحة أكل و لا حاجة, أبسليوتلي!!) كان الشيخ في أذاعة القرآن الكريم بيقول الحديث بتاع 

(الصلوات الخمس, والجمعة إلى الجمعة, ورمضان إلى رمضان كفارات لما بنينهما إذا اجتنبت الكبائر)

فالموضوع جه في دماغي تاني, و قلت لأ دا أكيد كده أشارة من ربنا, أنا لازم أبص في موضوع الكبائر ده إن شاء الله...و طبعا

نسيت!!!

لحد ما جات لي العلامة التالتة!

 كنا قاعدين في محاضرة عادية جدا ملهاش أي علاقة بالموضوع و فجأة راح الراجل قايل بلا أي مقدمات:

 (الكبائر هما حاجة و سبعين كبيرة كده, و طبعا كلنا عارفين أن مغفرة الكبائر لا تكون إلا بتوبة, و أن فيه مذاهب بتكفر أصحاب الكبائر بس الحمد لله من عقيدة أهل السنة أن لا يكفروا أهل الكبائر من المسلمين ما لم يستحلوها ومعنى ذلك أن مرتكب الكبيرة كشارب الخمر أو نحوه لايحكم عليه بالكفر لمعصيته بل هو مسلم عاصي فاسق إلا أن يعتقد أو يقول باستحلال هذه المعصية لأنه يكون عاند الشرع وخالف النصوص ومخالفة النصوص كفرُ...نرجع لموضوعنا بقى)

و أنا كل اللي طلع عليه (حاجة و سبعين!!! ده كتير قوووووويي) و بعدين الراجل يسكت؟!

لأ طبعاً, راح نازل نزلة (إن على العبد أن لا ينظر إلى صغر المعصية والذنب، ولكن ينظر إلى عظمة من يعصي...و زي ما قال العلماء، فلا صغيرة مع إصرار)

حتى الصغائر؟!!

المهم قلت مابيدّهاش, الموضوع كده كبير, فسألت و فعلا قالوا لي أن الكتاب اللي بدور عليه أسمه "الكبائر للذهبي"

و أنا هكتب لكم هنا الكبائر في نفاط و اللي عاوز يرجع للأحاديث اللي بتثبت كده فهي موجودة بالكتاب

الكبائر

1) الشرك

2) قتل النفس

3) السحر

4) ترك الصلاة

5) منع الزكاة

6) عقوق الوالدين

7) اكل الربا

8) أكل مال اليتيم ظلماً

9) الكذب على النبي (يتضمن قول مقولة عنه و هو لم يقولها)

10) أفطار رمضان بلا عذر أو رخصة

11) التولي يوم الزحف 

12) الزنا

13) الأمام الغاش لرعيته, الظالم الجبار

14) شرب الخمر و إن لم يسكر منها

15) الكبر و الفخر و العلياء و التية 

16) شهادة الزور

17) اللواط

18) قذف المحصنات

19) الغلول من الغنيمة و من بيت المال و الزكاة

20) الظلم بأخذ أموال الناس بالباطل

21) السرقة

22) قطع الطريق

23) اليمين الغموس ( أن يحلف على ماض كاذباً عالماً- يعني يحلف كدب و هو عارف أنه بيكدب)

24) الكذاب في غالب أقواله

25) قاتل نفسه

26) القاضي السوء

27) القواد المستحسن على أهله

28) الرجلة من النساء و المخنث من الرجال

29) المحلل و المحلل له

30) أكل الميتة و الدم و لحم الخنزير

31) عدم التنزه من البول

32) المكّاس (زي قاطع الطريق و أوحش من اللص, يعني البلطجي)

33) الرياء و هو النفاق

34) الخيانة

35) التعلم للدنيا و كتمان العلم

36) المنّان (اللي بيمن على الناس)

37) المُكذّب بالقدر

38) المتسمع على الناس ما يُسترونه (اللي بيتصنط يعني)

39) اللّعان

40) الغادر بأميره و غير ذلك (غير ذلك دي للي بيُغدر فالعموم)

41) تصديق الكاهن و المَنجم

42) نشوز المرأة

43) قاطع رحم

44) المَصّور فالثياب و الحيطان

45) النّمام

46) النياحة و اللطم

47) الطعن فالأنساب

48) البغي

49) الخروج بالسيف و تكفير الكبائر

50) أذّية المسلمين و شتمهم

51) أذّية أولياء الله تعالى و مَعاداتهم

52) إسبال الإزار تعززاً و نحوه

53) لبس الحرير و الذهب للرجال

54) العبد الآبق و نحوه (هرب وخرج عن طاعة مولاه, وقت الرق و العبيد و كده يعني)

55) من ذبح لغير الله

56) من غيرّ منار الأرض (والمقصود به حدود الأرض ، أي إذا كان بينك وبين جارك حدوداً فقام جارك بالليل ونقل الحدود إلى جهتك ليقتطع من حقك شيئا)

57) سبّ أكابر الصحابة رضوان الله عليهم (ايوه, دي للشيعة :@)

58) سبّ الأنصار فالجُملة (مش في جملة, المقصود يعني دفعة واحدة)

59) من دعا إلى ضلالة أو سنّ سُنّة سيئة

60) الواصلة في شعرها و المُتفلجة و الواشمة (و المُتنمصة كمان على فكرة)

61) من أشار إلى أخية بحديدة (يعني لسه مضربوش بيها حتى!!)

62) من أدعى إلى غير أبيه (يعني سمى نفسه على أسم أب تاني و ساب باباه)

63) الطّيرة (التشائم, "وشه نحس" و الرغي ده كله)

64) الشرب فالذهب و الفضة (و الأكل فيهم كمان)

65) الجدال و المراء و اللداد ووكلاء القضاء (اللدد وهو شدة الخصومة, وكلاء القضاء دي مفهمتهاش)

66) من خصى عبده أو عذّبه أو جدعه ظلماً و بغياً

67) المطفف في وزنه و كيله (اللي بيغش في الميزان)

68) الأمن من مكر الله تعالى

69) الإياس من روح الله تعالى و القنوط

70) كفران نعمة المحسن

71) منع فضل الماء (الماء الفاضل فيها عن حاجة صاحبها و يكون حول البئر كلأ ليس عنده ماء غيره ولا يمكن أصحاب المواشي رعيه إلا إذا مكنوا من سقي بهائمهم من تلك البئر لئلا يتضرروا بالعطش بعد الرعي فيستلزم منعهم من الماء منعهم من الرعي)

72) من وسم دابة فالوجه (أو ضربها في وجهها)

73) القمار

74) الإلحاد في الحرم (مش فهماها)

75) تارك الجمعة ليصلي وحده

76) من جسّ على المسلمين ودلّ على عوراتهم

------------------------------------------

بس خلاص =)

أنا عارفة أنها أيام عيد و فرحة و كده

بس بما أنها من أحب الأيام إلى ربنا, ليه لا نأخذها فرصة للتوبة و الرجوع إلى الله عز وجل

و الله عفو كريم يحب العفو

اللهم اعفو عنا و أغفر لنا و أرحمنا 

صحيح! كنت هنسى : لبيك اللهم لبيك, لبيك لا شريك لك لبيك, إن الحمد و النعمة لك و الملك, لا شريك لك لبيك